Нийслэлийн онцгой байдлын ерөнхий газраас өчигдөр УИД-т гарсан гал түймрийн талаар мэдээлэл хийлээ.

НОБГ-ын гал түймэртэй тэмцэх хэлтсийн дарга, хурандаа Д. Мөнхсайхан: "Өчигдөр буюу зургадугаар сарын 7-нд 16:48 цагт Чингэлтэй дүүргийн нутаг дэвсгэрт байрлах Улсын Их дэлгүүрт гал гарч байна гэх дуудлага 101 дугаарын утсанд ирсэн. Тус дуудлагын дагуу гал унтраах 10-р анги 16:50 цагт очсон. Нийт найман ангийн 96 албан хаагч, 27 автомашин очиж ажиллалаа. 

Галын тархалтыг 17:30 цагт зогсоож, 21:30 цагт галыг бүрэн унтрааж хүлээлгэн өгсөн. Нэмэлтээр дөрвөн байгууллага тусламж үзүүлсэн. Мөн утаанд боогдсон долоон хүний амь насыг аварлаа. 
Галын шалтгааныг  тогтоохоор нийслэлийн цагдаагийн газраас  үзлэг хийж байна. Одоогийн байдлаар хохирлын хэмжээг  тогтоогоогүй байна" гэв. 

Н.Золзаяа