/2020.05.29/ Баянгол дүүргийн нутаг дэвсгэр, "Өргөө" кино театрын ард байрлах зургаан давхар орон сууцны барилгаас хүүхдээ тэвэрсэн эмэгтэй унасан харамсалтай хэрэг гарлаа. 

Тодруулбал, 2-3 сартай нярай хүүхдээ тэвэрсэн 30 орчим насны эмэгтэй зургаан давхрын цонхоор унажээ. Эмэгтэйг хүүхдийнх нь хамт Гэмтлийн эмнэлэгт хүргэсэн ч харамсалтай нь хоёулаа амиа алдсан байна. 

Хэргийн газарт цагдаагийн байгууллагаас үзлэг хийж байна. Энэ талаар албаныхнаас тодруулахад "Уг эмэгтэйг гэр бүлийн хүчирхийлэлд өртсөн, санамсаргүй унасан, амиа хорлохоор завдсан эсэх талаар ямар нэгэн мэдээлэл өгөх боломжгүй" гэв. 

Оршин суугчдын хэлж байгаагаар энэ хэрэгт холбогдуулан хэргийн газраас  хоёр залууг баривчилсан байна. 

Бид энэ хэргийн талаар эргэн мэдээлэх болно. 

НЭМЭЛТ:

ЦЕГ-ын ХМТ-ийн ахлах мэргэжилтэн, цагдаагийн ахмад М.Мөнхшүр 23:02 цагт өөрийн фейсбүүк хаягтаа "БГД-ийн 14 дүгээр хороо, 18-р байрны 6-р давхараас 37 настай эмэгтэй, хүүхдээ тэврэн өндрөөс унаж нас барсан хэргийн газарт Цагдаагийн байгууллага шалтгаан нөхцлийг тогтоохоор ажиллаж байна" хэмээн нийтэлжээ.