Өчигдөр цахим орчинд хайртай эмэгтэйдээ 60 сая төгрөгийн үнэ бүхий сарнай бэлэглэсэн гэх пост цацагдаж олон нийтийн анхаарлыг их татсан. Эл мэдээлэлтэй холбогдуулан тухайн 60 сая төгрөгийн үнэ бүхий сарнайг бэлэглэсэн хүн нь Ерөнхий сайдын зөвлөх А.Амундра гэх мэдээлэл гараад байсан юм.

Тэгвэл өнөөдөр /2022.11.15/ тус цэцэг илгээсэн хүн нь А.Амундра биш гэдгийг Монголын өмгөөлөгчдийн холбооны гишүүн О.Санчирбал буюу түүний өмгөөлөгч мэдэгдэж, цагдаад хандаж худал мэдээлэл тараасан этгээдэд хуулийн хариуцлага хүлээлгэх хүсэлт гаргасан талаараа мэдээлсэн.

Энэ талаар өмгөөлөгч О.Санчирбалтай холбогдоход "А.Амундра нь Ерөнхий сайдын зөвлөхөөр огт ажилладаггүй. Илт ташаа мэдээлэл тарж буйтай холбогдуулан шалгаж өгөх хүсэлтийг цагдаагийн байгууллагад гаргасан. Шалгалтын хариу гарсаны дараа тодорхой мэдээлэл өгнө. Ер нь энэ үйл явдлыг бидний зүгээс зохион байгуулалттай, улс төртэй холбоотой нөхцөл байдал байж болзошгүй гэх хардлага байна" гэв.