УИХ-ын гишүүн С.Жавхлан АН-д элслээ.

Үүнтэй холбогдуулан АН-ын дарга, УИХ-ын гишүүн С.Эрдэнэ, АН-ын УИХ дахь Зөвлөлийн дарга Д.Эрдэнэбат, УИХ-ын гишүүн С.Жавхлан нар мэдээлэл хийв. 

Энэ талаар АН-ын дарга С.Эрдэнэ "Сонгууль дөхсөн энэ цаг үед УИХ-ын гишүүн С.Жавхлан АН-д элсэх түүхэн шийдвэр гаргасанд бид туйлын баяртай хүлээж авч байгаа юм. Ардчилсан нам 2016 оны сонгуулиар 9 гишүүнтэй бүлэг парламентад орж ирж байсан. Тэгвэл дараагийн сонгуулийн өмнө, парламентийн дөрвөн жилийн үйл явдлын төгсгөлд бид 9 гишүүнтэй, элэг бүтэн боллоо. АН-ын бүлэгт элсэн нэгдэж, Ес дэх гишүүн болж орж ирж байгаа УИХ-ын С.Жавхландаа амжилт хүсье. Монгол оронд ардчилал, шударга ёс, хүний эрх, эрх чөлөөг дээдэлсэн үйл хэрэгт тань илүү их амжилтыг хүсэн ерөөе" гэв. 

АН-д гишүүнээр элсэж буй УИХ-ын гишүүн С.Жавхлан "Өнөөдөр АН-ын бүлэгт 9 дэх гишүүн болж, элсэж байгаадаа их баяртай байна. Өнгөрсөн дөрвөн жилд ганцаардаж, дуу хоолойгоо хүргэж чаддаггүй байсан. Өөрийгөө дайчилж, хичээж ажилласан ч дуу хоолой минь хүрсэнгүй. Харин өнөөдөр АН-д элсэж, олуулаа болж байгаад баярлаж байна. Цэнхэр тэнгэр шиг Монгол Улсаа хөхрөн цэнхэртүүлэх цаг айсуй" гэлээ. 

Мэдээллийн үеэр АН-ын дарга С.Эрдэнэ "Ардчиллын нэрийг улам өндөрт өргөж яваарай" хэмээн захиж, УИХ-ын гишүүн С.Жавхланд намын дүрэм, гишүүний батлах, туг, мөрийн хөтөлбөрийг гардууллаа. 

У.БИЛГҮҮН