Цахим хөгжил, харилцаа холбооны яамны дэд сайд Б.Болор-Эрдэнэ Олон улсын хуралдаанд оролцож байхдаа Орост сургууль төгссөн, боловсрол эзэмшсэн төрийн дунд шатныхантай холбоотой хэлсэн үг олон нийтийн эгдүүцлийг хүргэж эхэлсэн.

Тэрбээр "Орост боловсрол эзэмшсэн, хоцрогдсон ахмад, дунд шатныхан төрийн ажлыг хурдтай явуулахад саад болсон. Энэ нь Ерөнхий сайд, Засгийн газрыг ажил хийхэд саад тотгор учруулсан" гэх утгатай үг хэлсэн.

Тэгвэл энэ талаар Олимп, нийтийн биеийн тамир, спортын сайд Б.Бат-Эрдэнээс тодруулахад "Хүнийг боловсрол, нас хүйс, хөрөнгө чинээгээр нь ялгаварлаж болохгүй гэж заасан. Хаана боловсрол эзэмшсэн нь чухал биш. Тэр хүний хандлага, хариуцлага маш чухал гэж боддог. Төрийн алба бол залуу, дунд, ахмад үеийн алтан хэлхээн дээр явагддаг" гэлээ.