Эрээн хот дахь Монголын Улсын Консулын газраас иргэд, аж ахуйн нэгжүүдэд хандан сэрэмжлүүлэг гаргажээ. Тус мэдэгдэлд, цар тахлын улмаас тогтоосон хилийн хязгаарлалтын хугацаанд Монгол Улсын иргэд, аж ахуйн нэгжүүд Хятадаас бараа, бүтээгдэхүүн худалдан авахтай холбоотой цахим залилангийн гэмт хэргийн хохирогч болж, санхүүгийн болон сэтгэл санааны хохирол амсах тохиолдол нэмэгдсээр байна.

Түгээмэл шалтгаан:

• Хэлний бэрхшээлээс болж буруу ойлголцох
• Захиалсан тоо хэмжээ дутуу ирэх
• Захиалсан бараа, бүтээгдэхүүнээс өөр бараа ирэх
• Чанаргүй бараа ирэх
• Төлбөр шилжүүлсний дараа тохиролцооноосоо буцах, илүү төлбөр нэхэмжлэх зэрэг явдал олноор бүртгэгдэж буй аж.

Тиймээс Монгол Улсын иргэн, ААН-үүд Хятадаас бараа, бүтээгдэхүүн цахимаар худалдан авахдаа болгоомжтой байж, холбогдох хууль тогтоомжийн дагуу гэрээ хэлцэл байгуулах, маргаан гарсан тохиолдолд эрх ашгаа хэрхэн хамгаалах, аль улсын шүүхэд хандан шийдвэрлэх асуудлыг зайлшгүй тусгах, төлбөр тооцоог хийхдээ худалдагч компани, байгууллага, иргэний мэдээллийг сайтар нягтлан шалгаж, цахим гэмт хэргийн хохирогч болохоос урьдчилан сэргийлэхийг анхааруулж байна.