АН-ын бүлгийн хурлаар ярилцсан асуудлын талаар АН-аас мэдээлэл хийлээ. Энэ үеэр УИХ-ын гишүүн С.Одонтуяа дараах байр суурийг илэрхийллээ.

Тэрбээр, "Цаасан дээрх бодлогооор эдийн засгийг тогтворжуулна, мөнгөний хатуу бодлого барина гэх сайхан бодлого байна. Гэтэл үнэн хэрэгтээ орж ирсэн тоонуудыг нэг бүрчлэн үзэхэд ямар бодлого алга.

Нэгдүгээрт, ажлын байр бий болгох зүйл огт алга. Ажлын байр 2000 оны үеэс багассан орсон. Инфляц асар их хөөрөгдөж, цаашид бараа бүтээгдэхүүний үнэ улам л нэмэгдэнэ. Яагаад гэвэл шинээр нэг ч хөрөнгө оруулалт хийхгүй гэж бичиж байгаа нь сайхан болов ч 2,5 их наяд төгрөг зарцуулна гэж байна. Бид яагаад алдагдалгүй төсөв оруулж ир гээд байна вэ гэвэл өнөөгийн энэ алдагдалтай төсвөөр бид гадаад өрийг төлөх ямар ч боломж байхгүй байна. Яаж энэ өрийг төлөх гээд байна вэ. Хэрэв төлж чадахгүй бол шууд дефолт зарлагдана. Нэг үгээр хэлэхэд 2023 оны төсөв бол асар их тэлсэн төсөв орж ирсэн. Эдийн засагт муу үр дагавар авч ирнэ.

Үүнээс гадна нүүрсээ офтек гэрээгээр ихэнх мөнгийг нь аваад урьдчилаад хэрэглэчихсэн. Эрчим хүчний үнэ үүнээс болоод нэмэгдэж эхлэнэ. ААН-үүд үүд хаалгаа барьж эхлэнэ, юмны үнэ өснө.

Ингэж эдийн засгийг хэтэрхий өөдрөгөөр төсөөлж орж ирэх нь ард түмнийг хуурч байгаа асуудал юм" хэмээлээ.