Хошин урлагийн болон дэлгэцийн урлагийн тайзнаа од болон гялалзаж явсан жүжигчин Ц.Ганбаяр /Ганбаа/ элэгний хорт хавдрын улмаас цэл залуугаараа хорвоогийн мөнх бусыг үзүүлсэн. Тэгвэл энэ сарын 30-ны өдөр түүний хамгийн сүүлд дүр бүтээсэн кино болох "Гадны нөлөөгүй" уран сайхны кино нээлтээ хийх аж.
Түүнээс гадна "Гадны нөлөөгүй" МУСК-г талийгаач Ц.Ганбаяр болон жүжигчин Т.Баттулга /Батушка/ нар санаачлан, продюсер Р.Оргилтой уулзсанаар энэхүү кино бүтсэн байна. Уг кинонд С.Болд-Эрдэнэ, С.Сарантуяа, Т.Баттулга, З.Батхүү тэргүүтэй жүжигчид дүр бүтээсэн ба жүжигчин, найруулагч Д.Галбаярын бүтээл аж.
Тус киноны зохиолыг 2020 онд анх бичиж эхэлсэн бөгөөд хоёр жилийн турш ажилласан талаар найруулагч Д.Галбаяр цахим хуудсаараа дамжуулан мэдээлж байсан бол ийнхүү нээлтээ хийхэд бэлэн болжээ.
