ОХУ-ын ерөнхийлөгч В.Путин өчигдөр өглөө Украинд байлдах хүчээ нэмэгдүүлэхээр бүх нийтийг хамарсан цэргийн дайчилгаа зарлаад буй.

Энэхүү мэдэгдлийн дараа ОХУ-аас гадагш нисэх ихэнх нислэгийн тасалбар зарагдаж дууссан аж. Тэгвэл ОХУ-Монголын Хиагт боомт дээр ОХУ-аас манай улс руу орохыг хүссэн хүмүүсийн цуваа үргэлжилж байгаа талаар хэвлэлүүд мэдээлж буй.

Энэ талаар Хил Хамгаалах Ерөнхий газраас тодруулахад "Алтанбулаг боомтоор 2022.09.20-ны өдөр ОХУ-аас Монгол Улс руу 263 иргэн орж ирсэн бол 2022.09.21-н буюу өчигдрийн байдлаар тус улсаас манай улс руу 261 иргэн орж ирсэн байна." гэх мэдээллийг өглөө. Мөн боомтод ямар нэг бөөгнөрөл үүсээгүй, үйл ажиллагаа хэвийн үргэлжилж байгаа гэлээ.