ЗГХЭГ-ын дарга Д.Амарбаясгалан, ЦХХХ-ны сайд Н.Учрал нар Иргэний нисэхийн ерөнхий газар, МИАТ, Буянт-Ухаа нисэх буудалд ажиллажээ.

Хөшигийн хөндийн шинэ нисэх буудал ашиглалтад орсонтой холбогдуулан Буянт-Ухаа нисэх буудлыг хэрхэн үр ашигтай ашиглах тухай шийдэл гаргах шаардлагатай. Улмаар цаашид уг буудалд "Нисэхийн сургалтын төв, Цахим хөгжил инновацын төвийг тус тус ажиллуулахаар боллоо" хэмээн ЗГХЭГ-ын дарга Д.Амарбаясгалан мэдэгдлээ.

Буянт-Ухаа хэмээх нисэхийн зориулалттай томоохон бүтээн байгуулалтыг зориулалтын дагуу ашиглах хамгийн оновчтой шийдэл нь Нисэхийн сургалтын төв юм. Мөн цаг агаарын болон бусад зайлшгүй шалтгааны улмаас Хөшигийн хөндийд онгоц буух боломжгүй үед Буянт-Ухааг нөөц нисэх буудал болгон ашиглах юм.

Нисэх буудлын оффисын талбайн зарим хэсгийг Цахим хөгжил инновацын төв болгон зохион байгуулж, Цахим хөгжил харилцаа холбооны яам ажиллахын зэрэгцээ тус салбарт үйл ажиллагаа явуулж байгаа хувийн болон төрийн өмчит компаниуд нэг дор байрлаж үйл ажиллагаа явуулах боломжийг бий болгохоор болжээ.

Ингэснээр Буянт-Ухаад Монголын цахиурын хөндийг хөгжүүлэх суурийг бүрдүүлэх, төвлөрлийг сааруулах төрийн бодлогыг хэрэгжүүлж хэд хэдэн төрийн байгууллага, хувийн хэвшлийн компаниудыг хотын төвөөс нүүлгэх, мэдээллийн технологийн чиглэлийн компаниудад өсөж хөгжих, тэдгээрт ажиллаж буй Монгол инженерүүд аятай тухтай орчинд ажиллах бололцоог бүрдүүлэх боломжууд бий болно хэмээн албаныхан үзэж байгаа аж.