Эрх баригчид АН-ын хоёр гишүүнээр ҮХЦ-д мэдээлэл гаргуулахдаа АН-ын бүлгийн зарим гишүүдийг Засгийн газарт оруулна гэж мунхруулсан байгаа юм. Үүнд нь Н.Ганибал, Ш.Адьшаа тэргүүтэй АН-ын бүлгийн хэсэг нөхөд итгэсэн байгаа юм. Тэгээд ч болоогүй. Засгийн газрын бүтэц бүрэлдэхүүнээ өргөтгөж Үндэсний эв нэгдлийн Засгийн газар байгуулна. Үүндээ тогтолцооны өөрчлөлт, ҮХНӨ-ийг ярьж байгаа ХҮН-ын төлөөллийг ч оруулна гэж нэмж сэнхрүүлжээ. Сайдын сандал суудлын хувьд АН-д 3-4, ХҮН-д 1-2 сайд өгнө гэж АН-ын бүлгийн цөөн хүрээнийхэнтэй МАН тохирчээ. Тохирчээ ч гэж дээ, хулхиджээ.
Хачирхалтай нь АН-ынхан энэ үгэнд нь бат итгэж, ХҮН-ынхан хэзээ ч ийм зүйл болохгүй мэдэж байсан тул улс төрийг “тоглолт” хийж, эрх баригчдын хөлд сууснаар тогтолцооны асуудлаа наадмын өмнө Цэцээр шийдүүлсэн. Харин Н.Ганибал, Ш.Адьшаа, Д.Ганбат тэргүүтэй АН-ынхан “давхар дээл”-ний асуудлыг чинь бид шийдүүлсэн гэж бухимдаж, өнөөдрийг хүртэл дараагийн Засгийн газарт орно гэж саарал ордныг метрлэж яваа сурагтай.
Тэр ч байтугай сайдын суудлынхаа тоог нэмэх санаа гаргаж эрх баригчдыг бүр мөсөн айлгаж, цочоожээ.
Товчхондоо, АН-ыг засагт оруулах ямар ч шаардлага Ардын намд байхгүй. Хэрвээ оруулсан нөхцөлд нэгдүгээрт, ард түмний шүүмжлэлийг даахгүй. Ардчилсан намд итгэхгүй учраас л муу ч, сайн ч МАН-ыг олонх болгосон.
Хоёрдугаарт, Ерөнхий сайд Л.Оюун-Эрдэнэ намынхандаа “тасдуулна”. Тэртээ тэргүй 62 гишүүн нь сайдын суудалдаа багтаж шингэхгүй алалцаж байхад дундуур нь бүлэгтэй, бүлэггүй нь мэдэгдэхгүй АН-ын хэдэн бүтэлгүй нөхдүүдийг танхимдаа чирээд ирвэл гал дээр тос асгаснаас илүү юм болно. Өөрөөр хэлбэл, Ерөнхий сайд дотоод улс төрөө даахгүй. Тиймээс хэзээ ч ийм тэнэг алхам хийхгүй байх.
Гуравдугаарт, үнэхээр хамаг арга заль, эрх мэдлээ ашиглаад АН-ыг засагтаа орууллаа гэж бодъё. Мэдээж нам л юм чинь АН-ынхан хурган улс төр хийх нь ойлгомжтой. Шинэ Засгийн газарт нь орж хамаг өрөм, тосыг нь хамчихаад 2023 оны сүүлээр засгаас нь гарчих магадлалтай л хүмүүс. Засаг төрөө гурван удаа огцруулсан МАН-ынханд дараагийн сонгуулиар иргэд итгэх үү. Ийм эрсдэлтэй алхам хийх үү гэдэг сонин.
Эцэст нь нэмж хэлэхэд, улс төрийн нөхцөл байдал ийм ээдрээтэй байхад АН-ыг Засгийн газартаа оруулах мунхаг хүн Ардын нам дотор нэг ширхэг ч байхгүй. Ямар С.Баяр шиг том төсөл урагшлуулах гэж байгаа биш. Бүтэлтэй, бүтэлгүй Ш.Адьшаа, Н.Ганибал, Д.Ганбат тэргүүтэй нөхдүүд МАН-д ямар ч хэрэггүй. Яаж ч бодсон улс төрийн хүрээнийхэн дунд сүүлийн өдрүүдэд гараад буй “АН-ыг засагт оруулна” гэдэг яриа МАН-аар тоглуулж ҮХЦ рүү “захиа” зөөж гүйсэн хэдхэн хүний л бодол биз.
Харин ингэж бүтэхгүй юм мөрөөдөхийн оронд Цэцэд өгсөн гомдлынхоо төлбөрт бүлгийн даргаа огцрууллаа гэж ойлгоод дараагийн бүлгийн даргаа томилохоо бодсон нь дээр дээ АН-ын бүлгийнхэн минь.
Г.Лхагвадорж
