Чуулганы нэгдсэн хуралдаан эхэллээ. Өнөөдрийн хуралдаанаар 14 асуудал хэлэлцэнэ. Хуралдааны эхэнд УИХ-ын гишүүн, АН-ын бүлгийн дарга Д.Ганбат үг хэлэв. Тэрбээр "УИХ-ын зарим гишүүд Д.Ганбатад зориулсан буюу нэг хүнд зориулж хууль өргөн барьсан. ТББХ-ны хуралдаанд уг асуудлаар завсарлага авсан. Монгол Улсад хоёр хуваагдаагүй зүйл байхгүй. Хоёр хуваагдсаны нэг нь Ардчилсан нам. Бид туулах ёстой зүйлээ туулаад явж байна. Гээндээ ч бий. Гоондоо ч бий. Бидний буруу. Гэхдээ гуравдугаар сарын 31-нд УДШ АН-ын дүрмийг бүртгэсэн. Сарын өмнө хоёр байсан АН-ын тамгыг нэг болгосон. Үүнтэй холбогдуулан УИХ-д шийдвэрээ явуулсан.

АН-ын бүлгийн найман гишүүн байгаа. УИХ-д даргад албан ёсоор ирсэн байх. Үүнийг хуулийн дагуу албан ёсоор танилцуулна уу. Мөн УИХ-ын гишүүд хамтран УИХ дахь нам, эвслээс бүлгээс өөр зохион байгуулалтаас өөр хэлбэр үүсгэхийг хориглоно гэж байгаа. Гэтэл УИХ дахь АН-ын бүлгийг хоёр болгохоор зарим хүмүүс өөр юм зохион байгуулж байна. Ингэж болохгүй ээ. Хуулиар энэ боломжгүй. МАН олонхи байна. Гэтэл та бүхэн жангийнхантай нийлж, манай АН-ын асуудлыг шийднэ гэж байхгүй шүү. Ёсзүйтэй байгаарай" гэлээ.

УИХ-ын дарга Г.Занданшатар "Д.Ганбатыг ёс зүйтай байж, хууль дээдэлж ажиллахыг шаардаж байна. Намын бүлгийн даргаар таныг томилогдсныг зарлачихсан, 11 гишүүнтэй. Түүнээс найман гишүүнтэй гэж зарлах эрх надад байхгүй" гэв.