Улсын Ерөнхий прокуророос УИХ-ын гишүүн Ё.Баатарбилэг, Х.Ганхуяг, Г.Амартүвшин, Н.Алтанхуяг нарын бүрэн эрхийг түдгэлзүүлэх хүсэлтээ УИХ-ын даргад хүргүүлээд буй. Уг хүсэлтийг Халдашгүй байдлын дэд хороонд шилжүүлсэн болохыг УИХ-ын дарга Г.Занданшатар мэдэгдсэн.
Гишүүдийн бүрэн эрхийг түдгэлзүүлэх эсэх асуудлыг хуулийн дагуу 5 хоногт багтаан шийдвэрлэх тул Халдашгүй байдлын дэд хороо маргааш хуралдахаар товложээ. Энэ тухай МАН-ын бүлгийн дарга Д.Тогтохсүрэн "УИХ-ын даргын зөвлөл хуралдаж, энэ долоо хоногийн хэлэлцэх асуудлын төлөвлөгөөнд өөрчлөлт оруулсан. Халдашгүй байдлын дэд хороо маргааш хуралдаж, дөрөв дэх өдөр ТББХ, ХЗБХ хуралдана.
Улмаар баасан гаригт УИХ-ын чуулганы хуралдаанаар хэлэлцэж, эцэслэн шийднэ" гэх мэдээллийг өгсөн билээ.
