Улсын Ерөнхий прокурор асан М.Энх-Амгаланг АТГ-аас шалгаж буй. Учир нь түүнийг Ерөнхий прокуророор ажиллаж байхдаа эрүүгийн хэрэг наймаалцсан байж болзошгүй хэрэгт буруутгаж байгаа юм. Тодруулбал, ҮАБЗ-ийн нарийн бичгийн дарга асан А.Гансүхийн шалгагдаж буй хэргийг хэрэгсэхгүй болгохдоо оронд нь газар эзэмших эрх шилжүүлж авсан хэргээр шалгаж байна.
Тэгвэл яг одоо АТГ-аас Ерөнхий прокурор асан М.Энх-Амгалан болон түүний хамаарал бүхий хүмүүсийн обьектуудад нэгжлэг хийж байна. Улмаар АТГ-т аваачиж, мэдүүлэг авахаар болжээ.
Өнгөрсөн баасан гаригт А.Гансүх болон М.Энх-Амгалан нарыг АТГ-аас мэдүүлэг өгөхөөр дуудсан боловч тэд очоогүй байна.
Сануулахад, А.Гансүхийн 201201000154 дугаартай эрүүгийн хэрэг 2017 оны арваннэгдүгээр сарын 2-нд Нийслэлийн прокурорын газарт шилжсэн. Тэгвэл яг энэ өдөр “Нью даун таун” ХХК-ийн хувьцаа эзэмшигчдийн нэрсэд хэн нэгэн өөрчлөлт оруулж, Магванноровын Бат-Амгалан гэх хүн 16 хувийн хувьцаа эзэмшигч болжээ. “Нью даун таун” ХХК-ийн шинэ хувьцаа эзэмшигч болсон Магванноровын Бат-Амгалан нь тухайн үед Улсын Ерөнхий прокуророор ажиллаж байсан Магванноровын Энх-Амгалангийн төрсөн дүү юм.
Тодруулбал, А.Гансүх дээр дурдсан “Суруга Монгол” ХХК-аас 10 га газар салгаж чадсан “Нью даун таун” ХХК-аар дамжуулан тухайн үед Улсын Ерөнхий прокурор байсан Б.Энх-Амгаланг авлигадаж, эрүүгийн хэргийнхээ хөөн хэлэлцэх хугацааг дууссан гэх үндэслэлээр хэргээ хаалгаж, ялаас мултарсан байж болзошгүй байгаа юм.
Г.Лхагвадорж
