Засгийн газар уржигдар /2022.04.08/ ээлжит бусаар хуралдаж жагсагчдын тавьсан 15 зүйл бүхий шаардлагаас өөрийн эрх мэдлийн хүрээнд дангаар шийдвэрлэх боломжтой 11 зүйлийг хэлэлцэн шийдвэрлэсэн.
Тус хурлаас гарсан шийдвэрийн дагуу Байгаль орчин, аялал жуулчлалын яам хэрэгжилтийг хангуулж шийдвэр гаргалаа.
Тодруулбал, Байгаль орчин аялал жуулчлалын сайд, дэд сайд, тус яамны төрийн нарийн бичгийн дарга, бүх шатны дарга нар болон харьяа байгууллагуудын дарга нарыг дөрөвдүгээр сарын 11-ний өдрөөс эхлэн хөдөө орон нутагт албан томилолтоор ажиллахаас бусад үед албаны автомашин ашиглахыг хориглов.
Мөн тус яамны эд хөрөнгийн бүртгэлд байгаа хөдөө орон нутагт албан томилолтод ашиглахаас бусад туулах чадвар сайтай автомашинууд, удирдах албан тушаалтнуудын ашигладаг автомашинуудыг дуудлага худалдаагаар худалдаалж, орлогыг улсын төсөвт төвлөрүүлэхээр болсон талаар БОАЖ-ын сайд Б.Бат-Эрдэнэ мэдээллээ.
