Баянзүрх дүүргийн 26 дугаар хороонд өнөөдрийн 06:00 цагаас эхлэн гуравдугаар сарын 21-ний 23:00 цаг хүртэл хязгаарлалтын дэглэм тогтоолоо. Энэ хугацаанд ямар арга хэмжээг хэрэгжүүлэх талаар тус дүүргийн Засаг дарга Н.Баярмөнх сэтгүүлчдийн асуултад хариулж, мэдээлэл өглөө.
-Баянзүрх дүүргийн 26 дугаар хороонд өнөөдрөөс эхлэн тав хоногийн хугацаанд хөл хорио тогтоолоо. Энэ хугацаанд ямар ажлууд хийхээр төлөвлөөд байна бэ?
-Уг хороонд хязгаарлалтын бүс тогтоосноор одоогийн байдлаар PCR шинжилгээ хийгдэж байна. Мэргэжлийн байгууллагууд дүн шинжилгээ хийж, тухайн хороонд хязгаарлалт тогтоож, коронавирусийн халдвар илрүүлэх шинжилгээг авах шаардлагатай гэсний дагуу дүүргийн Засаг даргын захирамжаар энэхүү үйл ажиллагааг явуулж байна. Тандалт судалгааны 20 баг ажиллаж байгаа. Өнөөдрийн дотор оршин суугчдын 80 хувийг, маргаашдаа багтаан коронавирусийн халдвар илрүүлэх шинжилгээнд 100 хувь хамруулахаар төлөвлөсөн. Иргэдийн шинжилгээг авсны дараа 50-65 насны иргэдийг вакцинжуулна. Харин үүний дараа хорооны нутаг дэвсгэрийг бүхэлд нь ариутган, халдваргүйжүүлэх юм. 2020 оны арваннэгдүгээр сарын 11-нээс хойш Баянзүрх дүүргийн 26 дугаар хороо, ялангуяа орон сууцны хорооллуудад голомтолж гарах шинж ажиглагдаж байсан. Тус хороо нь дүүргийн хэмжээнд хамгийн том хороо бөгөөд 31,000 хүн амтай. 18-аас дээш насны 16 мянган иргэнээс шинжилгээ авна. 50-65 насны 2,800 иргэнийг дархлаажуулж, 97 мянга орчим м.кв-д ариутгал халдваргүйтгэл хийнэ.
-Сүүлийн долоо хоногт дунджаар хэдэн тохиолдол бүртгэгдсэн бэ, яагаад хороог бүхэлд нь хязгаарлах болсон бэ?
-Улсын Онцгой комиссоос хөл хориог чангатгахаас татгалзаж байгаа. Шаардлагатай тохиолдол хороо, байр эсвэл орцоор нь тусгаарлана. Харин 24 цагаас дээш хугацаанд хөл хорио тогтоох нөхцөлд мэргэжлийн байгууллагуудаас ирсэн санал, бичиг баримтуудыг үндэслэн дүүргийн Засаг дарга захирамж гаргах ёстой. Бид иргэдээ аль болох чөлөөтэй байлгаж, эдийн засгаа дэмжих бодлого барьж байгаа ч зайлшгүй тохиолдолд шинжилгээ хийх шаардлага гарсан. Иймд иргэд дэмжиж оролцох хэрэгтэй байна. Өнгөрсөн хугацаанд иргэдээс хэд хэдэн удаа шинжилгээ авч байсан. Иргэдэд эрт зарлахад зуслан руугаа эсвэл хорооноосоо гараад өөр тийшээ явах тохиолдол гарсан. Ингэснээр шинжилгээг үр дүнгүй болгодог тул энэ удаад иргэдэд орой мэдээлсэн. Мөн өрх бүрд зарлан мэдээлэл хүргэж, шаардлагатай утасны дугааруудыг өгсөн.
-Шинжилгээг хэрхэн авах вэ?
-Шинжилгээг явуулын баг гэрээс нь авна. Хамрагдах 16 мянган иргэний нэрсийн жагсаалтыг гаргасан. Жагсаалтын дагуу иргэдээс шинжилгээ авч, байхгүй тохиолдол тэмдэглэгээ хийж байна. Өмнө нь Нэг хаалга-Нэг шинжилгээ гэж авдаг байсан бол одоо 18-аас дээш насны хүн бүрээс шинжилгээ авна.
-Ахмад настнуудын дархлаажуулалтыг хаана хийх вэ?
-Хоёр цэгт зохион байгуулна. Баянзүрх дүүргийн 133 дугаар сургууль дээр нэг цэг, дөрвөн шугамтай байхаар гаргасан. Мөн өрхийн эмнэлэг болон хороон дээр нэг цэг, хоёр шугамтай байхаар зохион байгуулсан.
-Вакцин хийлгэсэн хүн бичгээ үзүүлээд хязгаарлалтын бүсээс гарч болох уу?
-Одоогоор коронавирусийн эсрэг вакцины хоёр дахь тунг хийлгэсэн хүн байхгүй. Иймд вакцин хийлгэсэн хүмүүс ч шинжилгээнд хамрагдана. Вакцины хоёр тунг хийлгэсний дараа хүний биед дархлаа тогтдог тул эхний тунгаа хийлгэсэн хүмүүс бусадтайгаа адилхан дэглэм баримтална.
-Хүнсний хангамжийн асуудлыг хэрхэн шийдвэрлэж байгаа вэ?
-Хүнсний дэлгүүр, эмийн сан хэвийн ажиллана. Мөн өрхийн эмнэлэг ажиллана.
-26 дугаар хорооны Засаг даргыг ажлаас нь халсан гэх мэдээлэл явж байна. Энэ асуудалд дээр ямар тайлбар өгөх вэ?
-26 дугаар хорооны Засаг дарга 5 хоногийн өмнө ажлаа хүлээлгэн өгөх өргөдлөө өгсөн. Түүнийг нь шийдвэрлээгүй байгаа. Тэр хүн ажлаа хийх нөхцөл боломж нь бий. Гэвч ажлаа хийхгүй байгаа. Тус хороон дээр ажлын хэсэг байгуулаад үйл ажиллагаа хэвийн явагдаж байгаа.
