Монгол Улсын Засгийн газрын шийдвэрийн дагуу Ойрх Дорнодын бүс нутгаас эх орондоо буцах хүсэлтэй иргэдээ авчирсан Агаарын хөлгийн дарга Цэнд-Аюушийн Ганбаатараар ахлуулсан нисэх багийнхныг Ерөнхий сайд Г.Занданшатар хүлээн авч уулзан, Монгол төрийн өгсөн үүрэг даалгаврыг амжилттай гүйцэтгэсэн баатарлаг үйлстнүүдээрээ бахархаж буйгаа илэрхийллээ.

Нислэгийн үйл явцтай холбоотойгоор Агаарын хөлгийн дарга Ц.Ганбаатар "Ойрхи Дорнодын бүс нутгаас иргэдээ авч ирэхэд 23 хүнээс бүрдсэн нисэх багийн бүрэлдэхүүн нийт 22 цагийн нислэг үйлдлээ. Онцгой нөхцөлд нислэг үйлдсэн тул бууж амрана гэсэн ойлголт байхгүй тул нисгэгч нар хоорондоо амралтын цагаа тохироод нислэгээ гүйцэтгэсэн" гэв.