Багш нарын ажил хаялт үргэлжилж байна. Тэдний зүгээс цалинг 3.5 саяд хүргэх шаардлагыг тавьж буй. Эл үйл явцтай холбоотойгоор өмнөх Засгийн газар багш нарын цалинг нэмээгүй гэх мэдээлэл ч гарч эхэлсэн. Тэгвэл багш ажилчдын дундаж цалин болон хэлэлцээрийн талаар Боловсрол, шинжлэх ухааны сайд асан Л.Энх-Амгалангаас тодрууллаа. Тэрбээр "Багшийн дундаж цалинг 3 сая төгрөг гэж буруу зарласан үйлдэлдээ П.Наранбаяр сайд уучлал гуйх ёстой. Авдаггүй цалинг нь зарлахаар хүн бухимдана биз дээ. Багш нар маань нэг өдөр цалинг 3.5 сая болгох бус үе шаттайгаар нэмэх хэлэлцээрт суух нь илүү үр дүнтэй" гэв.
