Тээврийн цагдаагийн албаны Жижүүрийн шуурхай удирдлагын хэлтэст  энэ сарын 7-11-нд  зам тээврийн ослын шинжтэй 377 дуудлага бүртгэгджээ. Ослын улмаас таван хүн гэмтсэний хоёр нь гарцаар гарч явахдаа мөргүүлсэн байна.

Тодруулбал, Сүхбаатар дүүргийн зургадугаар хороо, Хүнсний 4-р дэлгүүрийн баруун замд Toyota Prius  маркийн автомашины жолооч А нь  гарцаар гарч явсан 20 настай эмэгтэй А-г мөргөж гэмтээсэн осол энэ сарын 8-нд гарчээ.

Хан-Уул дүүргийн нэгдүгээр хороо, Чингисийн өргөн чөлөө, 120 мянгатын уулзварт Toyota Prius  маркийн автомашины жолооч О нь гарцаар гарч явсан 52 настай эмэгтэйг мөргөж гэмтээсэн осол энэ сарын 9-нд гарсан байна.

Энэ сарын 7-нд Баянзүрх дүүргийн аравдугаар хороо, уулын замд Mutsubishi Pajero  маркийн автомашиныг Б жолоодож яваад  Toyota Landcruiser маркийн автомашин мөргөж, ослын улмаас Mutsubishi Pajero маркийн автомашины урд хэсэг шатаж, жолооч 40 настай, эрэгтэй Б гэмтжээ. 

Цагдаагийн алба хаагчдын хяналт шалгалтаар нийслэлд согтуугаар тээврийн хэрэгсэл жолоодсон 23, орон нутагт 24 жолоочийг тус тус илрүүлж, хариуцлага тооцжээ. Мөн жолоо барих эрхээ хасуулсан үедээ согтуугаар тээврийн хэрэгсэл жолоодсон 1 жолоочийг шүүхээр баривчлуулсан аж.