Ардын хувьсгалын 104 жилийн ойн хүрээнд “Соёлын наадам”-ыг энэ сарын 11, 12-нд, “Уяачдын наадам”-ыг энэ сарын 13-нд Хүй долоон худгийн “Монгол наадам” цогцолборт зохион байгуулахаар болжээ.

Соёлын наадмаар монголчуудын эрхэмлэн дээдлэх үнэт зүйлсийн түгээн дэлгэрүүлэх гэсэн агуулгыг онцолж гэр бүл, түүх, соёл, тоглоом наадгай, монгол хэл, ёс суртахуун зэрэг үнэт зүйлсийг харуулсан 9 асар бүтэн өдрийн үйл ажиллагаа явуулна.

Наадамчид асраар зочилж угийн бичиг хөтлөх ёсон, угсаатны бий биелгээний онцлог, эх нутгийн талаарх аялгуу, уламжлалт тоглоомууд болон бусад соёлын үнэ цэнийг танин мэдэх боломжтой.

“Соёлын наадам”-д язгуур урлагийн төрлөөр дэглэсэн “Монгол эрдэнэ” тоглолт болон “Морьтны гайхамшигт” үзүүлбэрийг толилуулах юм. “Монгол эрдэнэ” тоглолт энэ сарын 11-ний өдөр 11:00, 14:00, 17:00 цагуудад гурван удаа, 12-ны өдөр 11:00, 14:00 цагуудад хоёр удаа үзэгчдэд хүрэх аж.