Нийслэлийн ЗДТГ-аас анх удаа зохион байгуулж буй нийслэлийн иргэдийн баяр Хүйдолоон худагт энэ сарын 28, 29-нд болно. Үндэсний бөхийн барилдаанд улс, аймаг, цэрэг, сумын цолтой 256 бөх зодоглоно. Тус барилдаанд барилдах бөхчүүдийг өнөөдөр, маргааш хоёр өдөр бүртгэж, энэ сарын 27-нд мандат олгохоор болжээ.
Иргэдийн баярт түрүүлсэн бөхийг 30 сая төгрөгөөр байлж, үзүүрлэсэн бөхийг 20, их шөвөгт шалгарсан бөхчүүдийг 10, дунд шөвөгт шалгарсан бөхчүүдийг 3 сая төгрөгөөр шагнахаар болжээ. Харин давааны бай 150 мянган төгрөг байх аж.
Наадмын өдрүүдэд Очирваань бурхан болон Их эзэн Чингис хааны тахилга, балин тосон урлагийн тэмцээн, номын мэтгэлцээн, 6 насны хурдан морины уралдаан, үндэсний сур харваа, шагайн болон морьт харвааны тэмцээн, сээр цохих тэмцээн болох юм.
