УИХ-ын нэгдсэн хуралдааны үеэр УИХ-ын дарга Г.Занданшатар өвөлжилтийн талаар “Өчигдөр аймаг орон нутгийн удирдлагуудтай цахимаар хурал хийлээ. Тэд нэг л асуудлыг гол болгож тавьж байна. Сүхбаатар аймагт боодол өвс 6000 төгрөг байсан бол малчдын гарт хүрэхдээ 15000 төгрөг, баруун аймгуудад 16000-18000 төгрөг, шуудай хорголжин тэжээл 48000 төгрөг, хивэг 22000-25000 төгрөгт хүрчээ. Гаалийн албан татвараас нь чөлөөлж, дэмжээд байхад үндэслэлгүй үнэ хөөрөгдөж байгаа асуудалтай ШӨХТГ, ХХААХҮЯ-тай хатуу тэмцэх хэрэгтэй. Зуд болоход нохой таргалдаг шиг өвс тэжээлийн үнэ нэмж, ядарч буй малчдаа шулж болохгүй” гэв.

Энэ жил зургаан аймагт өвөлжилт хүндрэх төлөвтэй байгаа. УОК, УЦУОШГ-ын судалгаагаар зудын нэн өндөр эрсдэлтэй ганц аймаг нь Баянхонгор болсон байна. Өчигдөр УИХ-ын даргын хийсэн цахим хуралдааны үеэр тус аймгийн удирдлагууд нутгийн 80 хувьд 3-30 см цас орж, хүйтэрч, бэлчээрт өвсгүй, тэжээл хомс байгаагаас мал хорогдож эхэлснийг дуулгасан.