Цар тахалтай холбоотойгоор аж ахуй нэгж, байгууллагуудын ихэнх нь сул зогсоод байгаа. Ийм нөхцөл байдал аж ахуй нэгж, байгууллагуудын хувьд хэцүүхэн даваа болоод буй. Энэ асуудалтай холбоотойгоор МҮЭХ-ны дэд ерөнхийлөгч  С.Эрдэнэбат мэдээлэл өгсөн юм.

"Хөдөлмөрийн тухай хуулиар сул зогсолтын нөхөн олговрыг цалингийн 60-иас доошгүй хувиар тооцож олгоно гэж заасан байдаг. Харин гэрээсээ ажиллаж байгаа хүмүүсийн тухайд, хуулиндаа дээрх дэглэмийн хугацаанд тухайн ажилтан зайнаас ажил үүргээ цахимаар гүйцэтгэж болох боломжтой бол ажил олгогч уг боломжоор нь хангаж, ердийн журмаар 100 хувь цалин хөлсийг олгоно. 

Манай улсад үйл ажиллагаа явуулж байгаа нийт аж ахуй нэгжийн 90 орчим хувь нь 1-10 ажилтантай. Эдгээр жижиг, дунд аж ахуй нэгж, байгууллагуудад цар тахлын энэ нөхцөл хүндээр тусч байгаа."

"Цаашдаа яах нь тодорхойгүй байгаа энэ нөхцөлд нэн яаралтай аж ахуй нэгж, байгууллага руу чиглэсэн шийдвэр зохицуулалт хийх хэрэгтэй. Ялангуяа үйл ажиллагаа нь зогсчихсон байгаа байгууллагууд арваннэгдүгээр сарын цалингаа тавихад ч бэрх байна. Цалингаа тавьж чадахгүй байгаагийн дээр цомхотгол хийхээс өөр аргагүй болсон байгууллага олон. Ажилгүйдлийн даатгалын сангийн мөнгийг иргэдэд ажилгүй болчихсон хойно нь өгөх биш ажилгүй болохоос нь хамгаалах чиглэлд зарцуулах хэрэгтэй. Хүнд нөхцөлтэй байгаа эдгээр байгууллагад чиглэсэн зээл, тусламж хэлбэрээр өгвөл үр дүнтэй" гэж харж байгаа тухай МҮЭХ-ны дэд ерөнхийлөгч  С.Эрдэнэбат хэлсэн юм.