УИХ-ын 2024 оны намрын ээлжит чуулган өнөөдөр /2025.01.24/ хаалтаа хийнэ. Тэгвэл чуулганы хуралдаан өнгөрсөн арванхоёрдугаар сард 11 удаа хуралдахад УИХ-ын гишүүн Х.Баттулга 7 удаа тасалж, 3 удаа эмнэлгийн чөлөө авч, 1 удаа оролцжээ. Харин УИХ-ын гишүүн С.Лүндэг 2 удаа тасалж, 9 удаа эмнэлгийн чөлөө авч, нэг ч суугаагүй байна.

Тэгвэл уг хоёр гишүүний асуудлыг хэрхэх талаар УИХ-ын гишүүн, Ёсзүй, дэгийн байнгын хорооны хуралдааны гишүүн А.Ариунзаяа "Чуулганы хуралдааны 40 цагийг тасалсан 1 л хүн байна. Жилд 5-аас дээш удаа чуулганы хуралдааныг шалтгаангүйгээр тасалсан бол Ёсзүйн, дэгийн байнгын хороогоор асуудлыг хэлэлцэнэ" гэх мэдээллийг өгсөн.

Үүнээс харахад чуулганы 11 удаагийн хуралдаанаас 7-г нь тасалсан УИХ-ын гишүүн Х.Баттулга Ёсзүй, дэгийн байнгын хорооны хуралдаанд "ШҮҮГДЭХ" болзлоо хангаад байгаа аж.