Улсын драмын эрдмийн театрын захирал, МУУГЗ Д.Цэрэнсамбуу гавьяаныхаа амралтад гарч байна. Тиймээс өнөөдөр Соёл, спорт, аялал жуулчал, залуучуудын сайд Ч.Номин хүлээн авч хүндэтгэл үзүүлжээ.

Ингэснээр тус театрын дараагийн захирал хэн байх вэ гэдэг нь олон нийтийн анхаарлыг ихэд татаж байна. Тэгвэл эх сурвалжийн мэдээлж буйгаар найруулагч Н.Наранбаатар УДЭТ-ыг удирдан ажиллахаар болж байгаа аж.

Н.Наранбаатар нь УДЭТ-ын ерөнхий найруулагчаар ажилладаг бөгөөд "Бооцоо", "Надаар тоглосон хайр”, “Жаргах гэж дурладаг уу?”, “Чи минийх”, “Шөнө дундын бүжиг”, “Нууц амраг чинь болъё”, “Дурлахыг хориглоно”, “Шөнө амталсан нулимс”, “Нэргүй од”, “Парисын дарь эхийн сүм” мюзикл, “Би ч гэсэн жаргамаар байна" жүжиг, “Тэнгэрийн хүү” түүхэн жүжиг, “Гамлет”, "Анна Каренина" сонгодог жүжиг зэрэг уран бүтээлүүдийг найруулан үзэгч түмэнд толилуулсан байдаг.