Баянзүрх дүүргийн нутаг дэвсгэрт байрлах “Офицер" хорооллоос орон сууц захиалсан иргэд өнөөдөр /2024.06.17/ мэдээлэл хийлээ. Тухайн иргэд 2022 оны дөрөвдүгээр улиралд ашиглалтад орно гэсэн гэрээ байгуулж орон сууц захиалсан хэдий ч өнөөдрийг хүртэл байрандаа орж чадаагүй байгаа аж.

Энэ үеэр оршин суугчдын төлөөлөл “Баянзүрх дүүргийн 13-р хорооллын “Офицер" хорооллын байрууд эхнээсээ ашиглалтад ороод эхэлсэн. Гэтэл н.Нямжав гэгчийн байгуулсан “Нөхөрлөл” ТББ-ын нэг л хүн гарын үсгээ зураагүй байгаагаас үүдэн 112 өрх хохирч байна. 100 хувийн төлөлт хийсэн айлууд ч олон байгаа. Байр ашиглалтад орж, нүүж ороход бэлэн болоод дөрөв, таван сар болсон ч оруулахгүй байна. Иймд бид Нийслэлийн орон сууцны бодлогын газрын дарга Г.Ганхүүтэй гурван удаа очиж уулзсан. Мөн Нийслэлийн Засаг даргын орлогч П.Сайнзоригтой очиж уулзсан ч үр дүнд хүрээгүй л явж байна” гэж мэдэгдлээ.

Б.МӨНХЗАЯА