Парламентын төлөөлөгчдийн олонхийн саналаар Сүга Ёшихидэ Японы шинэ Ерөнхий сайдаар томилогдлоо.

Санал хураалтын үйл явцыг парламентын доод танхимын цахим хуудас шууд дамжуулан хүргэсэн байна. Доод танхимын 462 депутатаас эрх баригч Либерал-Ардчилсан намын шинэ дарга Сүгад 314 нь саналаа өгчээ.

Төлөөлөгчдийн танхим шинэ ерөнхий сайдаа сонгохоор лхагва гарагт ээлжит бус хуралдааныг явуулсан байна. Доод танхимд Либерал-Ардчилсан нам болон Комэйто нам 465 суудлаас 313-ыг нь эзэлдэгтэй холбогдуулан Сүга Ёшихидэ ялалт байгуулах боломжтой байжээ.  Абэ Шинзо эрүүл мэндийн шалтгааны улмаас албан тушаалаасаа огцрох тухайгаа наймдугаар сарын сүүлчээр мэдэгдсэний дараа шинэ ерөнхий сайдыг сонгох шаардлагатай болсон аж.