Монгол Улсын Ерөнхийлөгчийн Тамгын газрын дарга Я.Содбаатар Төрийн бэлгэ тэмдгийн тухай хуульд нэмэлт оруулах тухай хуулийн төслийг тавдугаар сарын 13-нд УИХ-ын дарга Г.Занданшатарт өргөн мэдүүлсэн. Улмаар УИХ-ын чуулганаар тавдугаар сарын 22-нд Төрийн бэлгэ тэмдгийн тухай хуульд нэмэлт оруулах тухай хуулийн төслийг хэлэлцсэн юм.

Хуулийн төсөлд төрийн далбааг байнга мандуулах байршлыг Монгол Улсын Ерөнхийлөгч тогтоож болохоор заажээ.

Түүнчлэн Ерөнхийлөгчийн Тамгын газрын дарга Я.Содбаатар Монгол Улсын тусгаар тогтнол бүрэн эрхт байдлын бэлгэ тэмдэг нь төрийн сүлд, туг, далбаа, тамга, дуулал мөн хэмээн Үндсэн хуульд заасан тул “төрийн” гэх үгийг “улсын” болгож өөрчлөхийн тулд Үндсэн хуульд өөрчлөлт оруулах шаардлагатайг онцолсон юм. Мөн тэрбээр, энэ оны долдугаар сарын 10-нд тохиох “Төрийн далбааны өдөр”-өөр 60 метр өндөр төрийн далбаа мандуулах гэж байгаа талаар дуулгасан байна.

Дээрх хуулийн төслийг үзэл баримтлалын хүрээнд хэлэлцэх нь зүйтэй гэсэн саналаар санал хураахад гишүүдийн олонх дэмжсэн учраас анхны хэлэлцүүлэгт шилжүүлсэн байна.