Дэлхийн аварга шалгаруулах үзэсгэлэн тэмцээн 2024 оны дөрөвдүгээр сарын 25-28-ны өдрийг дуустал Хорват улсын нийслэл Загреб хотноо зохион байгуулагдаж байна.

Таван өдрийн өмнө Монголын Нохой Судлалын Холбоо болон Монгол банхар судлалын холбоо 8 хүнтэй баг бүрэлдэхүүн гурван Монгол Банхар болох Хангарьд, Гүен, Толигор нарынхаа хамт Загреб хотод очсон юм.

Энэ нь түүхэндээ анх удаа Монгол Банхар үүлдэр олон улсын рингэнд гарч дэлхийн нохой сонирхогч, үржүүлэгч, шүүгч нарын хүртээл болох гэж байгаараа онцлог юм. Монгол Банхарууд дөрөвдүгээр сарын 28-ны Ням гарагт 08:00 цагаас World Dog Show 2024 болон Croatia Winner үзэсгэлэн тэмцээнд оролцоно.Түүнчлэн үндэснийхээ өв соёлыг сурталчилж өөрийн павилионыг үзэсгэлэнгийн талбайд засжээ. Тус тэмцээнд дэлхийн улс орнуудаас нийт 18.355 нохой шилдгийн төлөө өрсөлдөхөөр цугласан байна.

Монгол банхар судлалын холбооноос "Нутгийн уугуул үүлдрүүдтэй өрсөлдөх тул ялах боломж их биш, хэдий тийм ч бид энэ том рингэн дээр ноходоо гаргаж, олон улсад харуулж чадсан нь аль хэдийн ЯЛАЛТ" гэж бодож байгаа гэдгийг илэрхийлжээ.