УИХ-ын чуулганы өчигдрийн хуралдааны үеэр Ерөнхий сайд ХЗДХ-ийн сайд, Хот хариуцсан сайд болон Хотын дарга нарын томилгоотой холбоотой гаргасан шийдвэрээ танилцуулсан юм. Энэ үеэрээ тэрбээр Хотын дарга асан Э.Бат-Үүлтэй холбоотой мэдээллийг хэлсэн. Тодруулбал, тэрбээр "Э.Бат-Үүл хотын дарга байхдаа "Сахал" Д.Эрдэнэбилэгтэй хамт хотхон бариад өөрөө амьдарчихсан. Удирдлагын академийн тэнд "Эрдэнийн төгөл" гээд хотхон одоо байж байдаг. АН-ынхан авлигын асуудал дээр намынхнаа битгий хамгаалаарай" гэсэн юм. Харин эл мэдээлэлд Хотын дарга асан Э.Бат-Үүл Ерөнхий сайдын гүтгэлэг хэмээн мэдэгдэж, шүүхэд хандана гэдгээ өөрийн албан ёсны цахим хаягаараа дамжуулан мэдэгдлээ.

Тэрбээр "МАН, нийслэлийг маш муу удирдсан, үнэндээ удирдаж чадахгүй байгаа явдалд би ямар ч буруугүй. Гэтэл чөлөөндөө байгаа жирийн иргэн намайг, хотын дарга байхдаа Удирдлагын Академийн газарт барилга барьсан мэтээр МУ-ын Ерөнхий сайд найгүй гүтгэн гүжирдэж байна. Би шүүхэд хандана" гэв.