Баянзүрх дүүргийн 11 дүгээр хороо, Богдхан-Уулын “Хүрхрээгийн-Ам”-ны автозамд 2 автомашин мөргөлдөж, 7 хүн хүнд бэртэж, 2 хүн амь насаа алдсан харамсалтай хэрэг гарчээ.

Энэ талаарх дуудлага мэдээлэл ОБГ-т өчигдөр өдрийн 10:00 цагт ирсэн бөгөөд Нийслэлийн Аврах ангийн алба хаагчид 15 км замыг туулан 10:18 цагт очиход “Приус-30” загварын суудлын автомашин, “Приус-20” загварын суудлын автомашинтай мөргөлдөж иргэн М /18 настай, эрэгтэй/, Б /45 настай, эмэгтэй/, Л /27 настай, эмэгтэй/, Э /18 настай, эмэгтэй/, М /18 настай, эрэгтэй/, Э /20 настай, эрэгтэй/, Б /20 настай, эрэгтэй/ нар хүнд гэмтсэн байсныг эмнэлгийн анхны тусламж үзүүлэн ГССҮТ-д тээвэрлэн хүргэсэн байна.

Харин иргэн Б /74 настай, эрэгтэй/ автомашины эд ангид хавчуулагдан нас барсан байсан тул цогцсыг гарган, иргэн Ү /20 настай, эмэгтэй/-д эмнэлгийн анхны тусламж үзүүлэх үед нас барсан тул цогцсыг нийслэлийн Тээврийн Цагдаагийн газрын мөрдөгчид хүлээлгэн өгчээ.

Иймд жолооч та бүхэн аюулгүй байдлаа ханган, болзошгүй аюулаас өөрсдийгөө хамгаалахыг уриалж байна.