ОБЕГ-оос гол усны үерийн талаар мэдээлэл хийлээ. ОБЕГ-ын дэд дарга, Бригадын генерал Б.Ууганбаяр "Сэлбэ голын усны түвшин нэмэгдсэн байгаа. Үүний улмаас тус голын далан сэтэрч, нийт 26 хорооны 31 мянган өрхийн 128 мянган хүн үерт өртсөн. БЗД, Сүхбаатар, Чингэлтэй, Хан-Уул, СХД-т үерт өртсөн 243 өрхийн 743 иргэнийг аюулгүй байршилд нүүлгэн шилжүүлсэн" гэв.

ОБЕГ-ын Ажиллагааны удирдлагын газрын дарга, хурандаа Б.Мандахгэрэл "Баяр наадмын амралтын өдрүүдэд аймаг, нийслэлд нийт 9 хүн голын усанд амиа алдсан харамсалтай хэрэг гарсан. Өнөөдрийн байдлаар 5 хүнийг эрэн хайх ажиллагаа үргэлжилж байна.

Мөн Өвөрхангай, Булган, Хөвсгөл, Говьсүмбэр аймагт 2,300 гаруй бог мал усанд урсаж хорогдсон гэх мэдээлэл ОБЕГ-т ирсэн байна. Дээрх бог малуудын сэг зэмийг устгах ажлыг харьяа байгууллагуудтай хамтран явуулж байгаа.

Мөн Дархан-Уул аймгийн тахианы аж ахуй эрхэлдэг газрын 1,500 орчим тахиа үерийн усанд хорогдсон гэх мэдээлэл ирсэн" гэлээ.