Чуулганы үдээс хойшхи хуралдаанаар Боловсролын ерөнхий хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэж эхэлсэн. Гэвч МАН-ын бүлэг дахин байр сууриа нэгтгэх шаардлагатай гэж үзэн, ажлын гурав хоногийн завсарлага авсан юм.
Хуралдааны үеэр гишүүд дараах байр суурийг илэрхийлж байв.
УИХ-ын гишүүн Ч.Хүрэлбаатар "Монгол Улс хөгжмөөр байна. Хөгжихийн тулд гарцаа яаж сонгох вэ гэдэг сонголтод ирээд байна. Ард түмний боловсрол гол түлхүүр юм. Англи хэл дэлхийн 53 улсын албан ёсны хэл. Бараг ихэнх орны албан ёсны хоёрдахь хэл. Англи хэл бол аялал жуулчлалын, техник технологийн, бизнесийн хэл. Болж буй бүх арга хэмжээний дийлэнх нь англи хэлээр явагдаж байна. Монголын хилээс гараад хурал цуглаан, үзэсгэлэн, экспо бүгд англи хэл дээр явагдаж байна.
Монгол Улс хөгжлөө түргэсгэе, боломжийг хурдан ашиглана гэвэл англи хэлэнд онцгой ач холбогдол өгөх ёстой.
Англи хэлийг хуульчлахгүйгээр хөтөлбөрт тусгаад явуулна гэж яриад байна. Энэ бол үлгэр. Хэрвээ хүүхдийн мөнгийг олгоно гэж хуулиндаа заагаагүй бол хүүхдийн мөнгө олгогдохгүй. Хуулинд заасан учир олгогдож байгаа. Тиймээс энэ асуудалд ухаан уралдуулж, овжин зальжин зан гаргалгүйгээр анхнаасаа өргөн баригдахад нь дотор нь байсан англи хэлний заалтыг тусгах хэрэгтэй" гэлээ.
