Өнгөрөгч долоо хоногт Ерөнхийлөгч У.Хүрэлсүхийн санаачлан боловсруулсан Улс төрийн намын тухай хуулийн шинэчилсэн найруулгын төслийг Монгол Улсын Ерөнхийлөгчийн Тамгын газрын дарга Я.Содбаатар Улсын Их Хурлын дарга Г.Занданшатарт өргөн барьсан. Тэгвэл эл хуулийн төслийг хэлэлцэх эсэх асуудлыг ирэх долоо хоногийн УИХ-ын чуулганы хуралдаанаар хэлэлцэхээр жагсаалтад оруулжээ.
Ташрамд дурдахад, төсөл нь долоон бүлэг, 46 зүйлтэй. Хуулийн төсөлд улс төрийн намуудын хариуцлагыг нэмэгдүүлэх, бодлогын институт болгон төлөвшүүлэх, санхүүжилтийг шийдвэрлэх, тэгш оролцоог хангах, намын дотоод ардчиллыг бэхжүүлэхэд чиглэсэн онцлох зохицуулалтууд багтсан талаар хууль санаачлагчид хэлж буй.
