Түлхүүр мэдээлэл:

• Их Британийн судлаачид үрэвслийн эсрэг "дексаметазон" эм нь Ковид-19-ийг эмчлэхэд үр дүнтэй байгааг олж тогтоожээ.
• Уг эм хүндээр өвдсөн хүмүүст маш сайн нөлөө үзүүлсэн ч, хөнгөн өвчилсөн хүмүүст огт нөлөөлөөгүй байна.
• Энэхүү эм нь хямд үнэтэй, түгээмэл байдаг тул буурай хөгжилтэй орнуудын иргэд ч өргөнөөр хэрэглэх боломжтой аж.

Хямд үнэтэй, олдоц сайтай “дексаметазон” эм нь Ковид-19 халдварыг эмчлэхэд үр дүн сайтай байгааг BBC агентлаг мэдээллээ.  

Тодруулбал, Их Британийн судлаачид үрэвслийн эсрэг уг эмийг үхлийн аюултай вирусийн эсрэг маш сайн үр дүнтэй байгааг туршилтаар олж тогтоосон байна. Судлаачдын үзэж буйгаар коронавирусний цар тахал дэгдэж эхлэх үед энэ эмийг хэрэглэсэн бол таван мянган иргэний амь насыг аварч болох байсан аж.

Тэд 2,104 өвчтөнд 10 өдрийн турш 6 миллиграммаар буюу бага тунгаар Dexamethasone эмийг өгсөн байна. Ингэхдээ ийм эм хэрэглээгүй 4,321 өвчтөний эмчилгээний үр дүнтэй харьцуулжээ.

Үр дүнд нь амьсгалын аппаратанд орсон өвчтөнүүдийн нас баралтын тоо гуравны нэгээр буурч, хүчилтөрөгчийн нэмэлт эмчилгээтэй хүмүүсийн үхлийн тоо 20 хувиар багассан байна. Харин амьсгалын болон хүчилтөрөгчийн аппарат хэрэглэх шаардлагагүй буюу хөнгөн өвдсөн хүмүүст нөлөө үзүүлэхгүй байжээ.

Үүний дээр “Дексаметазон” нь хямд үнэтэй тул буурай орнуудад ч ихээхэн тустай юм.

Оксфордын эрдэмтэд туршилтынхаа үр дүнг удахгүй нийтэд дэлгэрэнгүй танилцуулахаар бэлдэж байгаа аж. Харин энэ хооронд цаг алдахгүйн тулд Dexamethasone эмийг хүндэрсэн өвчтөнүүдийн эмчилгээнд “стандарт” болгон хэрэглэхийг эмч мэргэжилтнүүдэд уриалжээ.

Эх сурвалж: BBC 

Х.Үүрийнтуяа