Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явц, байдлыг хянан шалгах түр хорооны Нотлох баримтыг шинжлэн судлах хоёр дахь шатны сонсгол өнөөдөр зохион байгуулагдаж байна. Үдээс хойшхи хуралдаанаар Хөгжлийн банкны охин компани болох “Ди Би Эм лизинг” ХХК-иас олгосон санхүүгийн түрээсийн зээлүүдийг хэлэлцэж байна.

Хөдөө аж ахуйг дэмжих сангаас улс төрд нөлөө бүхий дөрвөн этгээд 1.2 тэрбумын санхүүгийн түрээсийн үйлчилгээг “Ди Би Эм лизинг” ХХК-иар дамжуулан авчээ. Тодруулбал, УИХ-ын гишүүн Ж.Эрдэнэбатын "Сүүтэй" ХХК 138 сая төгрөгийн тоног төхөөрөмжийн лизинг, УИХ-ын гишүүн Б.Бат-Эрдэнэ "Атарчандгана" ХХК 138 сая төгрөгийн санхүүгийн түрээс, УИХ-ын гишүүн асан Н.Цэрэнбат "Булган буудайн түрүү" ХХК 512 сая төгрөг, УИХ-ын гишүүн асан А.Сүхбатын дүү А.Баттөгсийн Батдэлгэр Трейд ХХК 434 сая төгрөгийн санхүүгийн түрээсийн үйлчилгээг авсан байна.