Нүүрсний экспорт, тээвэрлэлттэй холбоотой асуудлаар холбогдох эрх бүхий байгууллагуудын тайлан, мэдээлэлтэй танилцах ерөнхий хяналтын сонсгол иргэдийн шаардлагын дагуу 13:00 цагт Их танхимд хийхээр болж хойшлоод буй. Учир нь сонсголд оролцогчдыг гурван танхимд хуваасан нь иргэдийн бухимдлыг хүргэсэн. Улмаар гишүүд дарга нар, жагсагчид, иргэдийн төлөөлөлтэй хамт нэг танхимд сууж байгаад ярилцах ёстой гэж иргэдийн зүгээс санал гаргасныг хүлээн авч Их танхимд нээлттэй сонсголыг хийхээр болсон юм.

Харин уг сонсголд орж чадаагүй зарим жагсагч Төрийн ордны баруун хаалганы дэргэд нүцгэн суулт зарлаж байна. Тэд "Ерөнхий сайдтай уулзах, мөн нүүрсний хулгайн нээлттэй сонсголд оролцуулах"-ыг шаардсан юм. Гэвч нүцгэн суулт зарласан иргэдийг осголтын нэгдүгээр зэрэгт орсон гэдгийг эмчийн үзлэгийн баг сануулж, 2-3 хүн ухаан алдсаныг, эмнэлгийн машинаар авч явсан байна.