Энэ сарын 03-ны өдөр Хөвсгөл аймгаас Нийслэл рүү ирсэн ачааны авто машины тэвшинд 162 ширхэг хөлдөөсөн тарвага малын гүзээнд нуун далдалж оруулж ирэхийг завджээ. Уг хэргийг Экологийн цагдаагийн албаны алба хаагчид СХД-ийн 32-р хорооны нутаг дэвсгэрт байрлах "Баруун туруун" дахь хяналтын цэгт үүрэг гүйцэтгэж байхдаа олж илрүүлсэн байна.

Тус хөлдөөсөн 162 ширхэг тарвагыг “Зоонозын өвчин судлалын үндэсний төвд” хүлээлгэн өглөө.

Дашрамд сануулахад, Монгол улсын Зөрчлийн тухай хуулийн 7.6.4-т “Агнуурын бүс нутгаас бусад газарт, эсхүл амьтныг агнах хориотой үед, эсхүл хориглосон хугацаанд, эсхүл хориглосон арга хэрэгслээр амьтныг барьсан, агнасан, тээвэрлэсэн бол зөрчил үйлдэхэд ашигласан эд зүйл, хууль бусаар олсон хөрөнгө, орлогыг хурааж, учруулсан хохирол, нөхөн төлбөрийг гаргуулж хүнийг гурван зуун нэгжтэй тэнцэх хэмжээний төгрөгөөр, хуулийн этгээдийг гурван мянган нэгжтэй тэнцэх хэмжээний төгрөгөөр торгоно” гэж заасан байдаг билээ.