УИХ дахь Ардчилсан намын бүлэг санаачилж, МҮХАҮТ-тай хамтран бизнес эрхлэгчдийн уулзалтыг өнөөдөр /2022.09.16/ зохион байгууллаа. Уулзалтад УИХ дахь Ардчилсан намын бүлгийн дарга О.Цогтгэрэл, УИХ-ын дэд дарга С.Одонтуяа, УИХ-ын гишүүн Н.Ганибал нар оролцов.

МҮХАҮТ-ын ерөнхийлөгч О.Амартүвшин "Өрхүүдийн дунд хийсэн судалгаагаар нэг айл сард -85 мянган төгрөг, жилд сая орчим төгрөгийн өр зээлэнд орж байна. Ажил хийж цалин аваад байгаа хэрнээ ийм хэмжээний өртэй үлдэж байна гэсэн үг. Цалин өсөөд байгаа юм шиг хэрнээ худалдан авах чадвар буураад байгаа. Реформын шинжтэй өөрчлөлт хийхгүй бол энэ процесс тасралтгүй үргэлжилнэ. Эдийн засгийн хүндрэл, бэрхшээлийг бид давж хараахан гараагүй. Жинхэнэ хүндрэл урд маань байгаа" гэлээ.