Төрийн байгуулалтын байнгын хорооны өчигдрийн хуралдаанаар Үндэсний баяр наадмын тухай хуулийн төслийг хэлэлцсэн. Ингэхдээ хуулийн төсөлд хэд хэдэн өөрчлөлтийг оруулахаар тусгасны нэг нь үзүүрлэсэн бөхөд цол олгодог болох өөрчлөлт юм. Тус заалттай холбоотойгоор өмнөх жилүүдэд үзүүрлэсэн бөхчүүдэд цол нэхэж олгох эсэх асуудал гишүүдийн дунд багагүй маргаан дэгдээгээд амжсан.
Эл асуудалд Шадар сайд С.Амарсайхан “Өнгөрсөн жил барилдсан бөхчүүдээс нэг нь ч цол авах боломжгүй. Учир нь 100, 101 жилийн ойг хамтатган тэмдэглэнэ гээд ЗГ-ын тогтоолоор хойшлуулсан. МҮБХ-ноос цол, чимэг олгох асуудал огт яригдаагүй. Хэрвээ цол олгоно гэвэл ЗГ-ын өнгөрсөн жилийн тогтоолыг хүчингүй болгож байж цол олгох тухай асуудал яригдана" гэв.
