Уулзалт бүрээ утга учиртай байлгах сан. Өнөөдөр ч , маргааш ч, нөгөөдөр ч...
Сурсан зангаараа автобусандаа хөл гараа гишгэчүүлэн суумаар байвч өнөөдөр татгалзана. Юу ч бодолгүй чихэвчээ зүүгээд хорвоогийн, дэргэд минь байгаа зүйлсийн талаар бодолхийлж алхахыг илүүд үзнэ. Аль эсвэл өвлийн хүйтэн өдрүүдээр тухтай уулзаж чадаагүй хэдэн нөхөдтэйгээ уулзаж суугаад, ярилцахыг ч илүүд үзэх нь бий. Дэргэдүүр өнгөрөхдөө “Хийцгүй юмнууд” гэх хүмүүсийн шүүмжлэл угтаа бидний уулзахад л зориулж гаргасан цаг хугацааг алдагдуулах хэмжээний асуудал биш учраас тийм ч чухал биш. Гэвч уулзалтын утга учир, уур амьсгал, нэгнээ хүндлээд ирсэн цаг заваасаа бид өөрсдөө хумсалдаг юм билээ. Албан уулзалт дээр ч тэр.
Мэдээж болзсон газраа, товлосон цагтаа очих нь соёл. Түүнээс давсан хүндлэл нь уулзсан л бол бие биендээ цаг хугацааг зориулах явдал. Гэвч манайханд ийм соёл тун ч тааруу. Бидний амьдралд арай ойр “наалдахаар” нь гар утсаа хэт их оролдох явдал.
“Гар утаснаасаа дүүжлэгдээд” гэх яриаг бид маазрал болгон ашигладаг ч бараг л бодит байдлыг ёжилсон агуулга. Найз нөхдийн хүрээнд эл байдлыг ойлгоод өнгөрдөг ч ажил хэрэгч уулзалт, арга хэмжээний үеэр таагүй сэтгэгдэл төрүүлдэг.
Өөрөөр хэлбэл, өөрийнхөө ч бусдын ч цаг заваас их бага хэмжээгээр хумсалж байгаа хэрэг. Тиймээс л хэн хэнийхээ алтан цагаас хумсалж байгаа бол зориулж ирсэн цаг хугацаандаа гар утаснаасаа дүүжлэгдэж биш түрхэн зуур өөрөөсөө хол байлгах ч соёл болчихоод байна. Ядахдаа л уулзаж буй хүнээ хүндэлж буйн том илрэл болно байх. Гэтэл олны дунд хээвнэг, үл тоомсорлож буй мэтээр уулзах төдийд л утсаа шагайгаад суучихдаг хүмүүс их. Гар утсаараа зохицуулах ажил их байж болно. Гэвч тухайн цаг мөчид өөрийнхөө асуудлыг бусдаас дээгүүрт тавих нь өөрөө асуудал.
Хайрлаж дурлахад ч ялгаагүй л дээ. Уулзах бүртээ утсаа шагайгаад суучихдаг хэр утасны цаанаас бие биенээ тоосонгүй гэж гомдоллох хосууд ч их. Бараг л түгээмэл ажиглагддаг зүйл. Тиймээс уулзаж учрах үедээ гар утсаа хэсэгхэн зуурт ч орхичих. Залуу хосуудад муудалцах асуудал мундахгүй. Шалтаг ч дуусахгүй. Гэтэл түүн дээр бие биеэ гар утаснаасаа ч илүүд үздэггүй нь байдлыг улам л дордуулахаас дээрдүүлэхгүй. Түүний оронд болж бүтэж байгаагаасаа бүтэхгүй байгаагаа хүртэл ярилц. Ойлголц. Цугтаа алх. Хайртай гэдгээ ч хэл. Гэр бүлийнхэндээ ч тэр.
Өнөөгийн нийгэмд завтайдаа бус зав гаргаад бие биетэйгээ уулзах тохиол л их. Тиймээс "зориулж" гаргасан цаг хугацаа, уулзалт бүрээ утга учиртай байлгах сан. Өнөөдөр ч , маргааш ч, нөгөөдөр ч...
