Шүүхийн ерөнхий зөвлөлөөс цаг үеийн асуудлаар мэдээлэл хийлээ.

Шүүхийн ерөнхий зөвлөлийн гишүүн Э.Зоригтбаатар "Шүүхийн ерөнхий зөвлөл 13 шүүгчийн асуудлыг шийдэж, Ерөнхийлөгчид өргөн мэдүүлсэн. Өөрөөр хэлбэл, Шүүхийн ерөнхий зөвлөл есөн жилийн турш шийдэгдээгүй энэ асуудлыг эцэслэсэн. Хохирсон шүүгч нарыг томилуулахаар Ерөнхийлөгчид өргөн мэдүүлсэн. Эдгээр шүүгчийг өмнө нь түдгэлзүүлсэн зүйл байхгүй. 2013 онд Шүүх байгуулах тухай хууль гарч, шүүгч нарыг тараасан. Ингэхдээ 13 шүүгчийг томилохгүй үлдээсэн. Энэ хууль нь Үндсэн хууль зөрчсөн болох нь тогтоогдсон. Энэ явцад өмнөх гурван шатны шүүхийн шийдвэр гарч байсан. Тухайлбал, Шийдвэр гарч дууссаны дараа Шүүх байгуулах тухай хууль Үндсэн хууль зөрчсөн гэж дүгнэсэн" гэлээ.

Сануулахад, Шүүх байгуулах тухай 2013 оны хуульд нийцүүлэн Шүүхийн ерөнхий зөвлөлөөс давж заалдах болон анхан шатны шүүгчдийг албан тушаалаас нь чөлөөлөх, эгүүлэн томилох саналыг Монгол Улсын Ерөнхийлөгчид 2013 онд өргөн мэдүүлэх үед нэр бүхий 12 шүүгчийг албан тушаалаас нь чөлөөлсөн боловч буцааж томилоогүй үлдээсэн, зарим шүүгч нарыг өөр шүүхэд шилжүүлсэн асуудал маргаан дагуулсаар байв.

Шүүхийн зохион байгуулалтын өөрчлөлттэй холбоотойгоор шүүгчийн албан тушаалаас чөлөөлөгдсөн боловч томилогдоогүй шүүгч нар Үндсэн хуулийн Цэц, шүүхэд болон холбогдох байгууллагуудад хандаж, улмаар Нийслэл дэх Захиргааны хэргийн анхан шатны шүүх 2022 оны 02 дугаар сарын 08-ны өдөр 0070 дугаартай шийдвэр гаргаж, нэр бүхий 12 хүнийг шүүгчээр томилуулах саналыг Монгол Улсын Ерөнхийлөгчид өргөн мэдүүлэхийг Шүүхийн Ерөнхий зөвлөлд даалгасан байна.

Шүүхийн ерөнхий зөвлөл 2022 оны 03 дугаар сарын 24-ний өдрийн ээлжит хуралдаанаар энэхүү асуудлыг хэлэлцэн, шүүхийн шийдвэрийг биелүүлж, нэр бүхий 12 хүнийг шүүгчээр томилуулах саналыг Монгол Улсын Ерөнхийлөгчид мэдүүлэхээр шийдвэрлэсэн байдаг.

Мөн 2013 онд шүүхийн зохион байгуулалтын өөрчлөлттэй холбоотойгоор шүүгчийг албан тушаалаас нь чөлөөлж, томилохдоо хууль зөрчсөн тухай Шүүхийн ерөнхий зөвлөлийн дарга Д.Зүмбэрэллхамд хандан гаргасан шүүгч Т.Энхмаагийн хүсэлтийг хүлээн авч, Захиргааны хэргийн давж заалдах шатны шүүхийн шүүгчээр томилуулахаар Монгол Улсын Ерөнхийлөгчид өргөн мэдүүлсэн аж.