Ерөнхийлөгчийн Тамгын газраас 2020 оны УИХ-ын сонгуулийг хойшлуулалгүй товлосон хугацаанд нь хийвэл санал өгөх эсэх талаар санал асуулга явуулж эхэлжээ.
Өчигдөр буюу дөрөвдүгээр сарын 8-ны өдрийн 17 цагаас эхлэн явуулсан санал асуулгад оролцсон иргэдийн 49 хувь нь сонгуульд оролцохгүй буюу саналаа өгөхгүй гэжээ.
Ерөнхийлөгч Х.Баттулга:
- 2020 оны 03-р сарын 25-ны өдөр шинэ коронавирусийн нөхцөл байдалтай холбоотой уриалга гаргасан.
- 2020 оны 04-р сарын 07-ны өдөр УИХ-ын хаврын чуулганы нээлтэд оролцож, гаргасан уриалгаа тайлбарлаж байсан юм.
Цар тахлын хөнөөлт аюул, эдийн засагт үзүүлэх сөрөг нөлөөг хэдий хүртэл үргэлжлэхийг тооцоолох боломжгүй ийм нөхцөлд “…Монголын улс төрийн намууд, улс төрчид сонгогчдоос оноо авах уралдаанд орж, сонгуулийн том том дүнтэй мөнгөн амлалтуудыг хууль зөрчин өгч байгаа нь цаг үеэ мэдрэхгүй байгаагийн баттай шинж мөнөөс мөн” хэмээн Монгол Улсын Ерөнхийлөгч Х.Баттулга дүгнээд эдийн засаг, санхүүгийн давхар хямралууд нүүрлэсэн нөхцөлд бидэнд зохисгүй амлалтын биш, хямралыг даван туулах бодит хөтөлбөр нэн шаардлагатай хэмээн үзэж байгаа юм.
Иймд улсын төсөвт тодотгол хийж, сонгуульд зориулсан болон тэвчиж болох бүх зардлыг танаж, түүнээс гарсан мөнгийг хямралын эсрэг арга хэмжээнд зарцуулах санал гаргаж байгаа юм.Та Монгол Улсын Ерөнхийлөгчийн дэвшүүлж буй санал, хэлсэн үг зэргийг сайтар уншаад санал асуулгад оролцсон гэдэгт итгэлтэй байна гэжээ.
