УИХ-ын намрын ээлжит чуулганы хуралдаан үргэлжилж байна. Хэлэлцэх асуудлуудын өмнө УИХ-ын гишүүн Н.Алтанхуяг горимын санал гарган үг хэллээ.

Тэрбээр "Арванхоёрдугаар сарын 31-нд Ардчилсан намыг асуудлаар Улсын дээд шүүх шийдвэр гаргалаа. Энэ шийдвэр хэдийгээр оройтож, үнэнд гүйцэгдэж гарч байгаа боловч би Дээд шүүхийн 20 гаруй шүүгчдээ баярлаж байна. Ямар ч байсан хоёр нам байхгүй гэдгийг нь тогтоосон байна. АН-ын дүрмийн хороо, сонгуулийн хороо, Үндэсний бодлогын хороо гээд бүгд хүчинтэй болохыг зөвшөөрсөн байна. Ганц асуудал байгаа нь намын даргыг бүртгэхгүй гэсэн хэвээр байна.

Хэдийгээр УДШ ийм шийдвэр гаргасан ч гэлээ УИХ-ын захирамжаар байгуулагдсан Ц.Мөнх-Оргил гишүүнээр ахлуулсан ажлын хэсгийн дүгнэлтийг заавал хэлэлцэх хэрэгтэй. МАН-ын мөнгөтэй бүлэглэл хулгай луйвар хийж байгаа. Танайхны зарим гишүүдийн тавьсан хүмүүс төрийн байгууллагуудаар тоглож байна. Гадаадын хөрөнгө оруулалттай ААН-ийн тамгыг хоёр болгож тоглож байна. Дундаас нь авилга авч байна. Тэр байтугай хэний ч халдаж болохгүй Монголд байдаг хоёрхон улс төрийн намын нэгийг хоёр тамгатай болгож тоглосон. Үүнийг гэхдээ шийдсэн. Нам дээр асуудал байхгүй. Намын даргаа яах ийхээ бид цааш шийдээд явах байх" гэв.