Сонгинохайрхан дүүргийн 32 дугаар хороонд байрлах “Тавантолгой түлш” ХХК-ийн хашаанд сайжруулсан шахмал түлшний үйлдвэр болох гурван барилга шатаж байсныг НОБГ-ын Гал түймэр унтраах, аврах анги газар дээр нь ажиллан унтраажээ. Үүнээс үүдэн түлш тасалдах эрсдэлтэй эсэх талаар “Тавантолгой түлш” ХХК-ийн Гүйцэтгэх захирал М.Ганбаатартай утсаар холбогдож тодрууллаа.
-Гал юунаас болж гарав?
-Баруун бүсэд нийт дөрвөн үйлдвэр ажилладаг. Үүний нэг үйлдвэрт нь үүрийн 04.00 цагт гал гарч, онцгойгийн албан хаагчид шуурхай ажиллаж унтраасан. 10 шугамтай үйлдвэрийн нэг шугам нь зогссон. 9 шугам хэвийн ажиллаж байгаа учир түлш тасалдах аюулгүй. Хэвийн горимоор ажиллаж байна. Галын шалтгааныг тодруулахаар онцгой, цагдаагийнхан ажиллаж байгаа.
-10 шугам нийлээд өдөрт нийт хэдэн тонн түлш үйлдвэрлэж нийлүүлдэг вэ?
-Улаанбаатар хотод манай зүүн болон баруун бүсийн үйлдвэрүүд нийлээд 3000-3600 тонн түлш нийлүүлж байна. Үйл ажиллагаа нь зогссон энэ шугам өдөрт 150 тонн түлш нийлүүлдэг байсан. Энэ шугамыг зүүн бүсийн нэг шугамаар нөхөж ажиллуулж байгаа.
-Хүн бэртэж гэмтсэн үү?
-Хүн гэмтэж бэртээгүй.
