Засгийн газрын ээлжит хуралдаан өнөөдөр боллоо. Хуралдаанаас гаргасан шийдвэрийн талаар ХХААХҮ-ийн сайд З.Мэндсайхан мэдээлэл өгөв. Тэрбээр "БНХАУ-ын нэг тэрбум долларын хөнгөлөлттэй зээлийн хүрээнд ХАА-н салбарт буюу мах, махан бүтээгдэхүүний экспортыг нэмэгдүүлэх чиглэлээр дөрвөн бүс нутагт дөрвөн үйлдвэрийг байгуулахаар шийдвэрлэлээ. Хорио цээрийн бүс бүхий малын мах боловсруулах үйлдвэр байх юм. Дорнод, Булган, Архангай, Ховд аймгуудад хийхээр төлөвлөж байна. Урьдчилсан байдлаар 78 сая ТЭЗҮ гарсан. Үйлдвэрийн хүчин чадал нь 10 га газарт төлөвлөгдсөн. Өдөртөө нэг мянга орчим бог, 200 орчим бод малыг боловсруулах хүчин чадал бүхий нийтдээ 20 мянган малыг хорио цээрийн бүсэд оруулж, вакцинжуулж, эрүүл гэж дүгнэсний дараа боловсруулах үйлдвэрт оруулна.

Энэ үйлдвэрийг барьснаар мал махны экспортын хэмжээг нэмэгдүүлэхээс гадна арьс шир боловсруулах үйлдвэрлэлдээ технологийн түүхий эдийг бэлтгэхэд маш чухал түлхэц болно. Нөгөө талдаа малчдын орлогыг нэмэгдүүлэхэд бодит нөлөөллийг бий болгоно. Жилд дунджаар 35 мянга орчим тонн махыг экспортод гаргадаг. Уг дөрвөн үйлдвэр ашиглалтад орсноор 22 мянган тонноор нэмэгдүүлэх боломж бий болж байгаа юм. Энэ ондоо бэлтгэл ажлаа хангаж чадвал ирэх онд ажлаа эхлүүлнэ. Гүйцэтгэгч талын өгсөн урьдчилсан мэдээллээр 1.2 жилийн дотор ашиглалтад хүлээлгэн өгнө гэсэн" гэлээ.