Дорнын эдийн засгийн чуулга уулзалт өнөөдөр ОХУ-ын Владивосток хотын Русский арал дээр эхэллээ. Чуулга уулзалтын эхний өдөр оролцогчид Арктикийн хөгжил, ОХУ, Монгол Улсын харилцаа, АСЕАН-ы орнуудтай хамтран ажиллах талаар ярилцана. Дорнын эдийн засгийн чуулга уулзалт Алс Дорнодын их сургуулийн хотхонд есдүгээр сарын 2-4-нд болно. Энэ жилийн чуулга уулзалтын гол сэдэв нь өөрчлөгдөж буй ертөнцөд Алс Дорнодын шинэ боломжууд юм.

Уулзалтыг энэ жил холимог хэлбэрээр зохион байгуулж байгаа тул зарим зочид цахимаар оролцож байна. Нийтдээ чуулга уулзалтад дөрвөн мянга орчим төлөөлөгч оролцох төлөвтэй байна.

Мөн Монгол Улсын Ерөнхийлөгч У.Хүрэлсүх урилгаар цахимаар оролцох бөгөөд тэрбээр тус чуулганд цахимаар үг хэлэх юм. Тодруулбал, Есдүгээр сарын 3-ны баасан гарагт орон нутгийн цагаар 15.00 цагт чуулга уулзалтын нэгдсэн хуралдааныг зохион байгуулахаар төлөвлөж байна. В.Путин нэгдсэн хуралдаанд биечлэн үг хэлэх бол Казахстаны Ерөнхийлөгч Касым-Жомарт Токаев болон Монгол Улсын төрийн тэргүүн Ухнаагийн Хүрэлсүх цахим хэлбэрээр оролцож үг хэлэх юм.