Архивын Ерөнхий Газраас кино, гэрэл зураг, дуу авианы баримтыг хадгалах, хамгаалах, ашиглахад хэрэглэгдэж байсан хуучны техник, тоног төхөөрөмжүүдийг олон нийтэд сурталчлах, архив, албан хэрэг хөтлөлтийн чиглэлээр суралцагчдад практик сургалт зохион байгуулах зорилгоор кино, гэрэл зураг, дуу авианы техникийн танхим/бичил музейг нээлээ. Тус танхим музейд кино хальс тоглуулагч, сэргээн засварлах, гэрэл зураг, фото хальс боловсруулах, дуу авианы соронзон хальс унших, хуулбарлах, аналог болон дижитал шилжилтийн үеийн тоног, төхөөрөмж, техник хэрэгслүүдийг байршуулсан бөгөөд эдгээр нь түүхэн дурсгалт зүйлсийг харуулахаас гадна техник, технологийн хөгжлийн үе шат, хувьслыг харьцуулан үзэх боломжийг олгож байгаагаараа онцлогтой.

БНМАУ-ын Сайд нарын Зөвлөлийн 1960 оны 216 дугаар тогтоолоор Урлагийн хэрэг эрхлэх хорооны харьяанд Кино зургийн архив байгуулагдсан нь өнөөгийн Архивын Ерөнхий Газрын Кино, гэрэл зураг, дуу авианы баримтын архивын эхлэл суурь болсон юм. Тус архив эдүгээ 65 жилийн түүхийг бүтээж, Монгол Улсын төр нийгэм, соёл, урлаг зэрэг олон салбарын түүхийг хөгжлийн түүхийг илэрхийлсэн үнэт өвийг хадгалан хамгаалж байна.

Тус архивын сан хөмрөгт 35 мм-ийн хальсан дээрх уран сайхны болон баримтат кино, олон арван жилийн кино мэдээ, баримтууд, 1900-аад оноос өнөөг хүртэлх гэрэл зураг, фото хальс, шилэн хавтан, цахим баримтууд, дуу авианы радио соронзон хальс, DVD, CD пянз зэрэг төрөл бүрийн баримтууд хадгалагдаж байна. Энэ нь манай улсын кино, гэрэл зураг, дуу авианы архивын сан хөмрөгийн нэг юм.