Монгол Улсын Ерөнхий сайд Г.Занданшатарын өгсөн чиглэлийн дагуу ЭМДҮЗ -ийг хуралдуулж (2025.08.14) ЭМД-ын сангийн 2025 оны төсвийн нарийвчилсан хуваарьт өөрчлөлт оруулах болон цаг үеийн шаардлагатай зохицуулалтыг тусгаж баталсан билээ.

Тус хурлаар хүүхдийн төрөлжсөн нарийн мэргэжлийн тусламж үйлчилгээнд квотын хязгаар тавихгүй байхаар болж эрт илрүүлгийн тусламж үйлчилгээний төсвөөс 8 тэрбум төгрөгийг он дуустал зарцуулахаар шийдвэрлэв.

Ингэснээр 8 тэрбум төгрөгөөр 2025 оныг дуустал архаг ангиллын улмаас тусламж авахаар хүлээгдэж буй 1250 орчим хүүхдийн мэс заслын тусламж, 1100 орчим хүүхдийн дотрын эмчилгээний тусламжийг үзүүлэх санхүүжилт хүрэлцээтэй болсон юм.