“Chicago Bulls”-ийн домогт тоглогч Скотти Пиппен El País сонинд өгсөн ярилцлагынхаа үеэр өнөөгийн NBA-д тоглосон бол ямар түвшинд байх байсан талаар хэлэхдээ:
“Би маш сайн тоглох байсан. Сагсан бөмбөгийн хэв маяг өөрчлөгдсөн нь үнэн, илүү хурдтай болсон. Гэхдээ миний тоглолтын хэв маяг 80, 90-ээд оны үед ч орчин цагийн сагсан бөмбөгөнд яг тохирохоор байсан. Тиймээс надад том сорилт болохгүй байсан гэж бодож байна.
Мөн би өнөөгийн NBA-д хамгийн шилдэг тоглогчдын нэг байх байсан гэж итгэдэг. Тэр үедээ хэр зэрэг хичээж байсан шигээ ажилласан бол өнөөдөр ч дээгүүрт явах байлаа” гэжээ.
Скотти Пиппен бол 6 фут 8 инч (ойролцоогоор 203 см) өндөр, бөмбөг дамжуулалт болон хамгаалалтаараа ялгардаг хүчний довтлогчийн байрлал дээр тоглодог тоглогч байсан. Тэрбээр хурдтай тоглолтод сайн дасан зохицдог, хамгаалалт ба довтолгооны аль алинд нь чухал нөлөө үзүүлж чаддаг тоглогч байв.
Ийм төрлийн олон талт тоглогчид өнөөгийн NBA-д хамгийн үнэ цэнтэйд тооцогддог. Тэд бөмбөг хуваарилж, багийн хамгаалалтыг удирдан, жижиг болон том бүрэлдэхүүнтэй тоглолтын аль алинд багийнхаа тоглолтын бүтэцтэй уян хатан нийцдэг.
Гэсэн хэдий ч түүний “өнөөгийн хамгийн шилдэг тоглогч байх байсан” гэх мэдэгдэл маргаан дагуулж байна.
Учир нь, Пиппен өөрийн тоглож байсан үедээ ч лигийн хамгийн шилдэг тоглогч хэмээн үнэлэгдэж байгаагүй бөгөөд тэр үед Майкл Жордан түүний хамтрагч, багийн гол лидер байсан билээ.
Мөн Пиппен карьерынхаа туршид гурваас ердөө 32.6%-тай шидэж байсан нь өнөөгийн гурван оноонд төвлөрсөн тоглолтод сул үзүүлэлт гэж үзэгддэг. Иймд орчин цагийн тоглолтод тэрбээр энэ чадвараа нэлээд ахиулах шаардлагатай байх байжээ.
Пиппен өнөөгийн NBA-д тоглосон бол магадгүй All-Star болон All-Defensive багт багтах хэмжээний тоглогч байх байсан ч “хамгийн шилдэг” хэмээх тодотголд хүрэхэд арай л дутуу гэж шинжээчид дүгнэж байна.
Өөрөөр хэлбэл тэр яг л өөрийн тоглож байсан цаг үеийнхээ адил гайхалтай, багийн тоглолтод үнэлэгдсэн, гэхдээ дээд түвшний супер од тоглогч биш хэвээр үлдэх байсан биз ээ.
